لما شفتك ربيع
لما شفتك وجاني
عطرك لي بفة..
داير أنادي أقول
بريدك صوتي بحة..
والعيون تاهت معاكي
وعانقت لي كل لمحة..
لمحة بين عينيك مسافرة
فى الخدود اللونها
قمحة..
شوقا اتخلل مسايرك
والجمال القامتو سمحة.
رقة ذي هشت بشائر
فى ابتسامتك ذايدة طرحة...
بي حنانك احتوتني
ولي تغازل نفحة نفحة...
فيها كم عربد شذاكي
وفى المشاعر ادا لفحة.
لفحة ذي غيم البشائر
صبة فى جواي فرحة.
ما القليب الشال غرامك
بدلت أحزانه مسحة..
همسة فى جواه دقت
لي حواسو النائمة صحى.
ما السهام الشايلة ريدك
احتوت أعماقه جمحة..
كليها سلم كل مشاعرو
وفى دروب حبك الحة..
والمقادير فوق طريقك
في حنانها الدافي سحة..
فيها غرد لي جمالك
والخصال السامية سمحة.